ياعم نجم

عارفة ان انتى نبض القلب
زى سؤال ومالوش رد
يبقى كلامى اكيد من عاشق
واقرى حروفه تلقى القصد
قصدى ان انتى الهدف السامى
عارف قيمتك كل حرامى
يسرق يعلا يجرى عليكى
ويقول على نفسه انه عصامى
حبه بحبة عايزله حصانة
تدى وقار برضك وضمانة
يصرف كام مليون ويعدى
ويسيب كل الناس عيانة
عمنا نجم ما قال فى بتاع
مافهمناش فضلت تتباع
ولما ابتدت الثورة حاتنجح
زودوا فينا كتير اوجاع
يا عم نجم خلاص خلصت
دما الخلايق هنا رخصت
وبدالبتاع بقى فيها بتوع
ويا ريت قلوب الناس حست
ماعرفش اقعد فى قهاودى
ولا هى جوى ولا غاوى
ولا لاقى شغلانة يا عمى
ولا فى مرضى فيه مداوى
ياعم انت صبرت ازاى
وازاى ماقولتش مليون اى
ده كام سنة وانا مش قادر
والمشكلة كلها فى الجاى
باكتب مافيش حد بيقرا
علشان ياعمى انا م الفقرا
ماعييش فلوس اطبع دواوين
والحلم ما يكفيش بكرة
انا خلاص حاكسر قلمى
وكفاية كدة حرقة دمى
ولا عدت حاكتب من تانى
مهما الساعات زادت همى
حانسى الحروف اللى قريتها
وحارمى كتبى اللى شريتها
حامسك مقشة واكون كناس
علشان عيالى اجيب قوتها
يا عم نجم ماتزعلشى
دورت لـكن مالقيتشى
وجوعت لجل كلامى يوصل
لكنه برضك ماوصلشى
خلاص حابطل واكل عيش
ويمكن اخلى كمان بقشيش
اه يا زمان فيك الشعرا
زى الطيور من غير الريش