تداخل مع قصيدة(مكرمش ليه )للشاعرة رشا عبد الرازق

مِكرمش ليه ؟
خطوط الحلم من جواك وجوايا
مكرمش ليه ؟
وليه صاحي فـِ مَعَاد النوم
وليه صايم في غير الصوم
عن الفرحة
عن الضحكه
وليه مهموم ؟
وليه راسم حداشر ألف بين حاجب وبين حاجب
وليه عمال بتتّاوب
كأن الفجر متأخرعلى معاده
وده معاده
مَعِنّ الفجر يا قلبي تعب م اللَّف في عيونك ومداري
دفنت الحلم في نهارك وفي نهاري
وليه وقفَّت مشواري
وسبت الخطوة تيجي وراك
وانا جواها بستناك
وموصلتش
وصلت انت ؟
يِجوز أيوا ومعرفتش
وجيت تضحك ... سألت كتير فمضحكتش
وجيت تبكي فمعرفتش !!!
وبتفكر كتير جدا
كتير جدا
في حرفي يوم ما وشوشته
وحبي لما مقسوم العذاب نادى
فخفت انتَ
ودشْدِشْته
وكفَّنت العيون الخضر في المنديل
على عتب السكوت والليل
وباقي الحلم كرْمِشْتُه
عشان يفديك


مِكَرْمِش ليه
خطوط ايدك بِتِرْعشها بنبضة خوف
عشان ملهوف ؟
طب اغزل لهفتك حتى قصايد شعر
بشاير ضهر
وخللِّي المغربية تسيل على كتافي ضفاير طهر
كما العشاق
وحبة حب !!!
وآه يا قلبي حبة حب ليه مخضوض ومستغرب ؟
ماتِجْمَدْ تاني وتِجرَّب
وايه يعني خيانه
اتنين
ولو عشرين
شوية عجز في الاحساس
على شوية عقول سانده الكلام عافيه على عكاز
جروح كانت علينا عزاز
بَقولْ " كانت !!"
وايه يعني ؟؟؟
اذا خدشوا الصور حاول بفن تِغيَّر البرواز
ومتخافشي مفيش خَسْران
وقال جَرَحو الجراح في الجرح قالت بس دوسو كمان
وجايز لو حاولت تصيب
بخيط تُلَِي على الفستان
أوانَك حان
رسم زاوية بمنقلتُه
ظبطها النوبه صدقني انا عايزاه وصدقته
مترمي الماضي وحكايته
وتُلْضُمْ فيَّه غمازتين بضحكة عمر في بدايته
وتِطْلِق بالكلام جناحين مع الطير اللي عششته
على التوب اللي كرْمِشْتُه
وعايش رغم كرمَشْتُه !!!
مكرمش ليه؟
الأستاذه رشا
اسمحى لى .. أغير أو اتلاعب بعنوان العمل وأجعله
حداشر ألف
هذه الجمله قد ساقتنى للدخول الى العمل وقرأته والعنوان جزء مهم جدا من العمل وان كان الألقاء 50% من نجاح العمل فان القصيده المقرؤه عنوانها يعادل نفس النسبه
سيدتى
((النقد الحديث يحتم أن يكون تحليل الناقد منصبا على القصيده وليس على الشاعر))
ومن هذا المنطلق ندخل العمل ونتعامل معه
الأستهلال
من البدايه ومن اللفظه الأولى أو التفعيله الأولى فى العمل والتى أختارته من بحر الهزج (مفاعيلن( هذا البحر عالى الموسيقى ومؤثر الحس فى السمع جدا
تدخل فى الموضوع وتوقفنى فى بداية مهمه تجعلنى اتابع وأقرأ
مكرمش ليه؟؟
استفهام يبدأ ويوقف داخلى الأجابه,أقرأ وأشعر وأعيش ولكنى لا أستطيع وصف روشته لما تعانيه.. أو استخدام مكواه لكى هذه الكرمشه أو فردها.
الصور الشعريه من بداية العمل, جعلت من العمل ترابط قوى وراءه شاعر متمكن , فاهم,يقول ما يريد,فى ترنيمه قصائديه معتمده على الهارمونى العالى .. المتلاحم, المعزوف فى سجيه وانسجام .
من البدايه ومن المدخل للعمل.. تضعنى أمام تساؤل مهم,تساؤل شعرى ومعنوى.
تتكلم عن نفسها ونفسى تشركنى فى حالتها وحالتى, تسأل عنها وعنى.. فالحلم المكرمش جواها وجوايا , فما سبب الكرمشه؟؟؟؟؟
والأستفهام مستمر , عن الصحيان .. عن الصوم, وليس صوم البطن وانما صوم الفرحه, الضحكه والعبوس الموجود بين الحاجبين والتثاؤب المستمر وتأخير النور وعدم اظهار بصيص واحد يجعل من الأتى أمل.....
تتابع العمل فى رصانه وجمال وثقه وتلاحم وقوه
تتابع كما القطرات فى السيل, يتابع بعضها بعض , بلا عوج ولا ميل., بلا زهق ولا ملل ولاحيل.
(وتأكد ان الفجرتعب من اللف والدوران)
وقد قامت بدفنه فى نهارها ونهارى.. ولا تنسى أبدا أن تشركنى فى تداخل العمل والأحساس به وان نتقاسم الحمل بيننا..
وتعود الى الأستفهام مرة أخرى بقوة المتعجب
وصلت انت..؟
يجوز ايوه.؟ ومعرفتش
.......................
دائما الأستهلال مهم,ومهم جدا,ولكن الأهم جدا جدا هو التتابع القوى,والنهايه الحتميه القويه,
بمعنى ان البدايه الضعيفه اذا كانت ضعيفه مسموح حتى تعطنى تتابع قوى ونهايه أقوى.
مكرمش ليه؟؟
مرة أخرى وجزء لا يتجزء من العمل,وبنفس البدايه\الأستهلال\الأستفها م,ولكن هذه المره ليست الكرمشه فى الحلم وانما فى خطوط...
اليد,الكفاح,الكد,العمل,الرم ز ..دخول الخوف داخل نبضة اليد والتساؤل لماذا؟؟ لماذا الخوف؟؟ هل هو
(عشان ملهوف)
الحل
طب اغزل من لهفتك حتى قصايد شعر
بشاير ضهر
وقوة التصوير والمعنى والصوره الشعريه عالية الفن والمعنى
الصور الشعريه
1-مكرمش ليه؟
2-خطوط الحلم
3-راسم حداشر الف
4-اغزل لهفتك
5-المغربيه تسيل
6-شوية عجز فى الأحساس
7-عقول سانده الكلام
8-خدشو الصور
9-رسم زاويه بمنقلته
10-وتلضم فيه غمازتين
11-وتطلق بالكلام جناحين
سيدتى
كلمه لابد منها
تداخل المعنى.. تقويته أو ضعفه
1\وليه صاحى فى معاد النوم؟؟
هذه الجمله أو البيت المقصد منه السهر ولكنه يضعف المعنى
لماذا؟؟
لأن هو سهران فى وقت النوم,لكن ممكن ينام فى وقت صحيان الناس فأصبح السهر مش اساس للقوة
2\كلمة معاد هى مظبوطه لكن عايزك تعرفى ايه الفرق بين معاد..... وميعاد
الأولى تعنى عوده والثانيه موعد
(ده للعلم)
3\ وليه راسم حداشر الف بين حاجب وبين حاجب؟؟
مستعذبه الجمله للوزن والقافيه اللى بعدها... لكن التركيب وكلمة بين مرتين....... ,
هى بين حاجب والتانى,بين الحاجبين,بين الحواجب
ده طبعا بصرف النظر عن الوزن والقافيه
4\وكفنت العيون (الخضر ) فى المنديل
اشمعنى الخضر؟؟ لو كانوا السمر ايه الفرق؟
اتمنى الرد فى الجزء ده بالذات لأنه وقفنى كتير وجيت(...........) هاقولك بعد الرد
4\طب اغزل لهفتك(حتى) قصايد شعر
كلمة حتى..................
اشكرك على سعة صدرك تحياتى




ماهر دياب
دمياط
عزبة البرج