سئلت الشهيد

سئلت الشهيد قبل الحصار ساعة نهار
تفتكر صوتنا هيوصل لأصحاب القرار؟
أبتسم وبهمس قال من غير هزار أحنا أصحاب القرار
شوفت فعنيه أمل لبكره ... شوفت مستقبل ومت الف فكره
بين جفونه كلام كتير مليان اسرار
وأشتد الحصار... و شوفت عسكر بسلاح ونار
والضرب دار من غير قرار
سبت أيده وأفترقنا وسط سيل من الغربان جرار
كنت بتلفت بدور عليه بس الليل سكن وانزاح النهار
وسط دخان كثيف وغاز مسيل قلب الليل نهار
وسمعت صوت بيقول شهيد.... قلبى أتنفض
قربت منه وشوفت بسمه تتفتح بيها طاقة الانتصار
كان لسه القلب بيدق والصوت ابتدى فى الانكسار
وبصوت رقيق هز قلبى قال كلام فيه جد وكان فيه هزار
بجد قال مصر أمى فديتها روحى مسحت من جبنها الغبار
وصل سلامى لكل أهل وبأخص أمى اللى داقت سنين مرار
قول ليها أبنك بطل عاش شريف ومات شهيد وأتحشر مع الابرار
قولها متصرخيش بدم أبنك أتمسح كل عار
قال كنت فاكر أننا بثورتنا غيرنا سنين فساد وده كان هو الهزار
كنت ماسك أديه وعينى بتبص فى عنيه والدم بيسيل زى الانهار
سكت الكلام والنفس ...كأنه نام وبضعف منى بدأت دموعى تنهار
صرخت بأعلى صوت كفايا حرام
قتلوا البرىء اللى حلمه يبنى بلده ويكسر ظلم النظام
والخسيس لسه عايش وبيتمتع ويترفه.... يا ناس ده اسمه كلام
قالوا علينا بلطجيه وعملا قبضين من الامريكان بالدولار
أعلام هزيل محتاج تطهير أو يتحرق بالسولار
يا مصر فوق وفرقى بين اللى ضحى واللى مقدمش حتى اعتذار
خلص الحصار وطلع النهار وكل ده موصلش صوتنا لأصحاب القرار