ياخساره ع الفلاح

(ياخساره ع الفلاح)

ياعم يافلاح سلــّمها للمولى

ماتقولش يوم حارتاح والدنيا فى مزاوله

نفذ الرصيد عندهم مافاضلش لك رنّه

والباقى سٍنـّه وتنسى انك تبع دوله

,,,,,

الزرع صابه العفن ومافيش تمن للفول

ولمّا حكم الزمن خلاك فى يدْ فلول

يادموع على مخدتك ومغطياك بلوتك

حاتقول لمين شكوتك ياقلة المسئول

,,,,,,

صيف الغلابه ابتدا والقطن مش مزروع

والمصنع اللى اشترى بنجر ماهش مقلوع

الجاز خلاص اتمنع واتجمّد المحصول

والرز مش مشتول علشان تموت م الجوع

,,,,,,

جيـبت الكيماوى شكك والسجن ع الابواب

حتى التقاوى بسكك عجّزت وانت شباب

ولا حدْ سائل عليك فى الشعب والشورى

وان جيت فى صوره يلاقوك باصص فى خُرم الباب

,,,,,,

الميّه متسمّمه والكهربا سرّت

والكلمه متكممه لم جات فى يوم قرّت

ايه اللى مانع نشوف العدل فى دقيقه

لمّا الحقيقه جرت من توبها واتعرّت

,,,,,

قلاعيّه مالكه البقر والأكل فيه مكروب

والليل مابان له قمر والبيت صبح مخروب

لاعملت مرّه اعتصام ولا اشتكيت حالك

ولا يوم عيالك شفوهم يحدفوا بالطوب

,,,,,

بطــّل تلف السواقى واشتغل عاطل

وبلاش تروّى ف شراقى الحق بالباطل

مالكش ذكرى فى برنامج مع مرشح

يهمه صوتك ويوم ماتعوزه بيماطل

,,,,,,

على جثــّة الفلاح كل الاسود هاجمه

يمكن وجود حضرته بـيْسبّب الأزمه

يايكون وجوده الاساسى ف تأسيس الدستور

يايغور فى آخر الطابور ان كان مالوش لزمه

,,,,,,

فلاحنا عيشته مرار والخيبه مالياها

حسدوه وقالوا على عيشته بامحلاها

ييجوا اللى قالوا كده ويشوفوا دلوقتى

راح يلعنوا اللى كتبها .. واللى غنَّاها

أحسنت أستاذنا الكبير وعمنا الحاج سعد

تقبل تحياتى واحترامى .. وعلى فكره انت واحشنا خالص

خلينا على بالك شويه باعمنا وحياتك .

صاحب الأبداع
وشاعر الفلاح

اللي دائما المصباح بيولع بتواجده حد تعبيري

صباح الفل

شاعر عدد المساهمات : 220 تاريخ التسجيل : 14/07/2011

الشاعر الكبير / سعد الشرقاوي

حقاً أنت شاعر نصيراً للضعفاء

أبدعت وأجدت في نصرة الفلاح

الله عليك
.

محمد البسيوني كتب:: فلاحنا عيشته مرار والخيبه مالياها

حسدوه وقالوا على عيشته بامحلاها

ييجوا اللى قالوا كده ويشوفوا دلوقتى

راح يلعنوا اللى كتبها .. واللى غنَّاها

أحسنت أستاذنا الكبير وعمنا الحاج سعد

تقبل تحياتى واحترامى .. وعلى فكره انت واحشنا خالص

خلينا على بالك شويه باعمنا وحياتك .

اخى الشاعر الكبير
الاستاذ/محمدالبسيونى
مرورا اعتز به
بارك الله فيكم
تقبلوا تحياتى وتقديرى

» أخبار محافظة الدقهلية وعاصمتها مدينة المنصورة
» قراءات ودراسات نقدية بقلم محمود سلامة الهايشة