ابراهيم العدل من كبار الشخصيات
عدد المساهمات : 45 تاريخ التسجيل : 05/07/2011
| موضوع: ثوره .. وبرضه حمير الخميس يونيو 21, 2012 3:45 pm | |
| ثورة .. وبرضه حمير !!
------
حمار وعامل دكر عزم الحمير على فول
راحت حمير البلد لجل انتخاب مسئول
يطلب فى يوم للعبيد ويقر فى الدستور
إن الحمير حقهم الرُّبْع فى المحصول
-------
أكلت حمير البلد هتفت لأسيادها
اللى مارحموا الحمير ولا شكروا أجدادها
هى البهايم كده زى العبيد إخوات
كل اللى بيهمهم العَلْقَه فى ميعادها
-------
والعيبه مش فى الحمير هم اللى ربُّوها
ربوها لجل الشقا من غير ما يعطوها
عارفين ودا نهجهم والله م الحوجه
لتلقى يوم نفسها فى السكه باعوها
-------
مالها البلد دى كده مالها ومال ناسها
دايما تبوس الأيادى واللى فى يوم داسها
أما الشريف تلعنه وتقول عليه مجنون
وهى لو تعرفه هتشيله فوق راسها
-------
مصر.. يا أحلى بلد ياجميلة لو فى الخيش !!
ليه للطيور أجنحة ؟ والبغل من غير ريش ؟
ليه الغراب والخراب دايما بنلقاهم
زى الفتوه الجبان واحنا يادوب حرافيش
-------
مصر.. يا أغلى بلد فى عيونى لو باعوا
أنا غصن من أصلكم بس الأصول ضاعوا
وإن كان لى فيكم عشم أو مرة شورتونى
انسوا الخلاف يا بشر أصل العبيد جاعوا
-------
مصر.. يا أول بلد فى الدنيا مسكت قلم
هو اللى عَبَد الإله زى اللى عَبَد الصنم
لازمتها أيه العقول لما الولاد دراويش
فاهمين بإن العباده معناها نصبح غنم
--------
دستور يا أهل الديار .. قبل الدخول دستور
دستور عشان اللى داخل يعرف أصول الدور
يعرف حدود الأدب والصح م العيبه
علشان فى وقت الخروج دايما يكون مستور
-------
خليك قليل الكلام خليك تملى كبير
لو شفت يوم الغلط متقلش دا تقصير
هو الحمار انتخب أيوه الحمار غلطان
أما أنت ليه إنسان والفعل فعل حمير
--------
بقلم / ابراهيم العدل | |
|