ما تصدقوش
لو قالوا عنها ما تستهالش
نموت عشانها
لو مش عشانها نموت
يبقي ما نستهالش
يوم نعيش
ما تصدقوش
ولو برروا يوم سكاتي
إني عادي
مش فارق معايا
كل اللي ماتوا
وإني هادي
ومايهمنيش
ما تصدقوش
مش عشاني ساكت
أبقي راضي
بس تايه مني الكلام
وقلمي فاضي
وكل دمعي
ما يملهوش
الميدان أكبر م القصايد
أو كلام يملي الجرايد
أو جرافيتي ع الحيطان
ولو كتبت ع الميدان
الحروف ماتكفهوش
ما تصدقوش
لو قالوا عنها ما تستهالش
كل اللي ماتوا
وإن اللي مات راح بلاش
وكل اللي عمله كان
فشوش
ما تصدقوش
اللي ماتوا حررونا
ولو قلنا عنهم غير كده
ملعون أبونا
وما نستاهلش حتي الكفن
أو النعوش
ما تصدقوش
لو قالوا مركبنا اللي تايه
هيدنوا تايه
ومش هيوصل يوم لبر
ولو غرقتم
ما تندموش
وإن الخناقة اللي ما بينا
هتدوم تملي
وإن اللي جوانا شر
والهدف هو
العروش
ما تصدقوش
اللي جوانا هو الإيمان
بيه هنوصل يوم لمينا
وهنتفق فى يوم أكيد
ع الحلم اللي مالينا
فماتيأسوش
الميدان اللي جمعنا
مايعرفش أسم حد فينا
لكنه حافظ كل
الوشوش
والوشوش هي هي
يمكن باعدنا حبتين
حبتين
يمكن توهنا يوم يومين
هما يومين
بس سايبين فى الميدان
الحلم ما خدنهوش
عشان كده لو قالوا يوم
عن حد فينا إنه جبان
أو مدان
أو راح ما جاش
ما تصدقوش
لو قالوا عن حدا فينا
خاين أو عميل
أو ذليل أو مهان
أو مات بلاش
ما تصدقوش
ولو قالوا يوم عن حلمنا
إنه أنتهي من غير ما يكمل
أو انتوا فوقتوا
بنقولكوا إنتوا اللي نمتوا
أما الحلم جوانا عايش
ما بنقتلوش
عشان كده
لو يوم قريتوا فى الجرايد
إن مصر إنحنت
ماتصدقوش
أو اتكتب جوه القصايد
إن الثورة انتهت
ما تركعوش
ولو كتبوا ع الجدران
إن الميدان
فى يوم انتحر صلوا فيه
وما تكفروش
الميدان مش مكان
الميدان هو صورة
لحلم شعب
عقل واحد
قلب واحد
الزمان ما يفرقوش
ولوحد قال غير
كده
ما تصدقوش