اعقل ياخيشه

موضوع: اعقل ياخيشه الجمعة يونيو 10, 2011 4:09 pm

(ارجع ياخيشه)
ينفع طول العمر ياخيشه
اقول لك اسمع مابتسمعش
وجاىّ تنظــّم تانى العيشه
وسايق فيها ومابترجعش
,,,,
آسف يابن الناس مش قادر
أسكت وانا شايف تخريـبك
بعْد ماعشْت سنين الفوْضه
وقولنا دا حظــّك واللا نصيبك
عمّال تسرق فينا وتنهب
واتعوّدْت ان احنا نسيبك
مرّه بنسكت من احراجنا
ومرّه لخاطر عبده نسيبك
,,,,,
فاكر واحنا فْ عزّ الثوره
وانت مأجّر كام نشّال؟
لاجل تحافظ على قرشينك
ومافيش شاغلك غير المال
والاسطبل بتاع محسوبك
كمّل ع المطلوب بجْمال
ونازل جرْى تقتـّل فينا
فكرك حانروّح فى الحال
يابنى دى ثورة جيل بالكامل
وماهش هيصه ولعب عيال
,,,,,
لاعبه معاك البلـْيه ياخيشه
وكنت ف جرّه طلعْت لبرّه
وجاىّ كمان تتحكــّم فينا
وكل يومين بتعيد الكرّه
وعمّال تهتف فى الاعلام
عاشت مصر بلدنا الحرّه
خلــّيت طعم الثورة الحلوه
من أفعالك صبحت مُرّه
,,,,,
أمّا الدّور والباقى ياخيشه
لمّا لقيتك نايب عنىّ
وانا ماحلمتش يوم فى حياتى
انك حتى تقرّب منىّ
فى اءتلافاتهم قاعد تفتى
تبرّءْ نفسك لاجل تدينىّ
,,,,,
وتحْرم كل الشعب المصرى
علشان كان فى الحزب الوطنى
وكل مجالس مصر بحالها
كانوا أعضاء فى الحزب الوطنى
ناسى بأنّ الجيل بالكامل
شال كارنيه الحزب الوطنى
حتى اطفال الدوله ياخيشه
كات مواليد الحزب الوطنى
يعنى الجيش اللى بيحمينا
هوّ دراع الحزب الوطنى
اللى بيرْضع واللى يشيخ
كان محسوب ع الحزب الوطنى
حتى محافظ كفر الشيخ
قاعد من ايّام الوطنى
يعنى فئات أو م العمّال
صعب يكون من برّه الوطنى
وحكومة تيسير أعمال
ضمّة كلّ زموز الوطنى
اللى هوايته يكمّل عـُمْرُه
يتسلــّح بالحزب الوطنى
وموظف مغلوب على أمره
بيْسجّل فى الحزب الوطنى
مارث كل الحق جنابك
واحرم منــّه الحزب الوطنى
,,,,,
حتى العضو بتاع القريه
حاطتْ عينك يابنى عليه
بعد ماكان للخير متطوّع
شادد نافه مغمىّ عنيه
شوفت فساده بسُرْعه ياخيشه
بعد الفقر مابان حواليه
طالع واكل نازل واكل
راتب شهرى تلاته جنيه
,,,,,,
عايز كلّ الشعب يبطــّلْ
أىّ سياسه ياخفــّة دمّك
علشان مانتش لاقى ياخيشه
حدْ يصُدّك واللا يلمّك
سيب الشعب يشقْ طريقه
لو كان أمر الشعب يهمّك
أو احسن لك تسمع شورتى
قبل ماناس فى الكفر تسمّك
لمْ الدّور واسمعنى ياخيشه
واتنيّل واقعد عند امّك
,,,,,,

موضوع: رد: اعقل ياخيشه الأحد يونيو 12, 2011 12:16 am

لا خيشه دا عاوز قعدة عرب
الشاعر الاستاذ سعد الشرقاوي

تعودة دائما عندما اعجب بنص او بقلم اقول عدسه محدبه
ولكن هذة المرة اقف امام نص مختلف التقطته كاميرة

خفيفه دقيقه ............
.............................
والله ياعمنا انا ضروسي قامت عليا من السياسه
حتى اني سقمتها بالاخص الجانب المصري
وعلى العموم نشوف اخرتها مع خيشه وعلى فين هيودينا وياّه
....................
...........
كل تقديري لشخصكم ولقلمكم

فاكر واحنا فْ عزّ الثوره
وانت مأجّر كام نشّال؟
لاجل تحافظ على قرشينك
ومافيش شاغلك غير المال
والاسطبل بتاع محسوبك
كمّل ع المطلوب بجْمال
ونازل جرْى تقتـّل فينا
فكرك حانروّح فى الحال
يابنى دى ثورة جيل بالكامل
وماهش هيصه ولعب عيال

ههههههههههههههههه

ياسلام ياسلام ياأستاذ سعد

كلمات رائعة رائعة حقا

بجد أمتعتنى وضحكتنى

سلم لنا قلمك أستاذنا الذى يمتعنا دائماً

وحلوة أوى إتنيل أقعد عند أمك

هى أمه لس عايشة

دا هو رجليه الإتنين برة

ههههههههههه

دمت بكل خير

تحياتى

الصـديـق

شــاعـر التـوتـة

الأســتاذ سـعـد الـشــرقـاوى

خـيـشـــــة .... والنـبـى تـقــولـلـى جـبـت الإسـم الفـلـتـة دا مـنـيــن ؟

كـلامـك دايـمـاً رائـع يـاعـمـنـا

إذا أردت أن أجـد الـمـتـعــة فى الكـلـمـات الجـمـيــلـة

فـسـوف أجـدهـا عـنـدك يـاشــاعـر

لك مـنـى كــل الـمــودة
حـمـدى شـبـانـة