لو كنتُو ما تعرفونيش
هاعرفكُم بنفسي انا مين
ولو مُش حقي اني اعيش
قولولي تموت يا مصري أمين
أنا مواطن مانيش إخوان
أنا مُسلم ... ومش ندمان
أنا اللي بحفظ القُرءان
وانا اللي إندست ف الميادين
..
أنا اللى طلعت ولقيتني
بـ احُط البذره جوه الطين
عشان تطرح وتديني
وأَأكِل منها ناس تانيين
أنا اللي أخدت لابتدائيه
والإعدادي والثانويه
درست الطِب ف الجامعه
وف الأزهر عرفت الدين
..
عرفت ان البلد ديا
ماهيش ليا لوحدي وبس
فهمت ان الوطن أحمد
ف إيد مايكل أكيد يتحَس
..
أنا اللي خرجت فى يناير
هتفت المَجد لبلادي
وكُنت ف وسطكُم ثاير
ودمي دمُكُم عادي
ما قولتش فِكركُم جاير
وتياركُم ماهوش هادي
أنا اللي بديني بـ اتعاير
وقولتو عليا إرهابي
..
أنا اللي هتفت سلميه
فا جاتني رصاصه ف لساني
وانا اللي ف لحظه وف ثانيه
بقيت عالشاشه انا الجاني
وانا اللي ف إيدي كان مُصحَف
فا قالو عليا إخواني
أنا مصري يا مصريين
مليش غيرها وطن تاني
..
رضا عثمــان