عن الكرامه .. ها أتكلم

11/2/2011 تاريخ سيفخر به كل مصرى " اتمنى ده "
11/2 مش تاريخ تنحى المخلوع على قد ماهو تاريخ لفتح صفحه جديده من الامتهان لكرامه الانسان المصرى
صفحه جديه اولها اللعب بالدماغ وف الدماغ وف المناطق الحساسه وف شرف كل بنت كانت واقفه فى التحرير بتطالب بحقها وحقنا فى " عيش / حريه/عداله اجتماعيه /كرامه انسانيه " وعن الكرامه ها اتكلم
" ارفع راسك فوق .. انت مصرى
ارفع راسك فوق ياض ... انت مصرى .. طاخ
عارفين ايه الفرق بين الجملتين
الفرق ان الجمله الولانيه بيقولها شاب مصرى كله حماس وحب لبلد خدت منه وعمرها ما اديته غير جنسيه بنتعاير بيها بره " والكلام ده كان قبل الثوره " خدت منه كل حاجه حتى لقمه العيش حتى احترامه لنفسه حتى كرامته الشاب كان بيقول الجمله وهو راسه مرفوعه وبيحب مصر بجد بيقولها فى الميدان بيقولها مع الادان بيقولها حتى فى حلمه اللى بيزوره خطف وهو نايم ع الرصيف قبل التنحى ويقوم مفزوع خايف من رصاصه تاخده او تاخد زميله اللى جنبه رصاص شغال والجيش موجود
الجمله التانيه بيقولها عسكرى فى الجيش بيقولها فى سجن حربى او فى س 28 او فى باحه المتحف المصرى بيقولها بسخريه وبصيغه الامر علشان الشاب اللى كان بيقولها فى الميدان يرفع راسه فيرزعه قلم او قفا او شلوت ف وشه فينكسر الشاب تانى الكلام ده حصل وبيحصل وها يحصل
يعنى ايه شاب نهائى معهد سينما يفقد الذاكره من كتر استخدام العصى الكهربائيه على دماغه يعنى ايه بنت تتسحل وتتعرى فى الشارع وتروح تتعرى تانى قدام عسكرى مفروض ان هو اللى بيحمى عرضها وعرضنا كلنا علشان يعرف هى انسه ولا مدام يعنى تتصور البنت ملط يعنى ايه كل واقفه يسحبلهم مجموعه يحبسوها يعنى ايه يصوروا شباب زى الورد فى لوكيشن مجهز مسبقا على انهم بلطجيه ويجيبوا السلاح من عندهم كمان " شغل فنادق بقى " ى
يعنى ايه يحققوا مع اعلامى او صحفى علشان نشر تقرير عن فساد الجيش طب ما الجيش فاسد وهما عارفين انه فاسد وانه زباله وانه جحيم بيحلم اى شاب فى مصر انه يخلص منه
هايقولى ازى تقول كده فى ناس بتتطوع فى الجيش وفى شباب هاتموت نفسها علشان تدخل حربيه اقولك الناس بتموت نفسها علشان تدخل حربيه علشان البرستيج وعلشان الوظيفه المضمونه والمتطوعين
نفس النظام الوظيفه ضاقت بيهم الدنيا بره وعايزين يعيشوا فمفيش بديل غير لقمه ميرى وربنا هو المعين
خلاص زمن اللى كان بيخش الجيش علشان مؤمن بقضيه او علشان الحفاظ على الشرف راح يوم ما بعتوا الشرف راح يوم ما بقى قسمكوا " مخلصا لرئيس الجمهوريه "ا
راح الشرف العسكرى يوم ماتت القضيه
الجيش وانا بتكلم على المؤسسه العسكريه من اولها اهوه بتكلم عن الدرع والسيف بتاعنا اللى احنا بندفعله من فلوسنا ومن دمنا ومن ولادنا ومن عمرنا علشان يبقلنا جيش زى بقيه دول الدنيا المحترمه الجيش الغير محترم ازاى يسمح لنفسه انه يضرب مواطن مصرى الجيش الغير محترم ازاى يسمح لنفسه يهين مواطن مصرى الجيش الغير محترم ازاى يسمح لنفسه ان يتفرج على عرض بنت عريانه قدامه
الجيش الغير محترم ازاى يسمح لنفسه يكسر اراده مصرى ازاى يكسر نفس شاب
ازاى الجيش الغير محترم يسمح لنفسهيقتل اى انتماء عند شاب لسه فى عشرينات عمره
الكرامه ياناس حاجه مش بنكتسبها الكرامه بتتولد جوانا وياتكبر معانا يا تموت جوانا الكرامه لو ماتت مات الانتماء ماتت الاراده ولو ماتت الاراده فى شباب اى شعب اعرف ان الشعب نفسه مات مات لغايه لما يجى جيل يبقى عنده ارداه يعنى قدامنا كمان 60 سنه علشان نخلص من فكره موت الاراده لان الاب بيورث الابن والابن بيورث الحفيد والدايره شغاله افهمونا بقى افهمونا ربنا يرحمكوا اللى بيحصل العن من اللى كان بيحصل قبل كده واللى جاى اسود من اللى فات اللى جاى لو كبر واستمر هانحتاج مليون شهيد زى الجزائر علشان نخلص منه حكم العسكر عار على مصر حكم العسكر عاااااااااااااااااار على مصر

الاستاذ عمرو شاهين

رجاء وضع الرابط في التوقيع
حتى يتنسى لنا قراءة الموضوع

لان الرابط واخد مسافه كبيرة

ولي عوة ان شاء الله