[
[والمصايف فاتحه ايديها
تحضن الزوار
وتفرش فوق خدودها
ضلها الناعم شماسى
ع الكراسى والعيون
كانت الاصوات بتنده
بيبسى كولا...شيبسى طازه
جيلاتى ساقع بالليمون
كانت الاصوات سفينه
والرايات الزرقا مينا
والعيال كتاكيت بتلعب ع الرمال
وكات قصادى وعينها منى
بحر موجو بيشاغلنى
كات قصادى وكان قصادى
حاجز الامواج وحاجز جوه منى
كنت يوسف غصب عنى
بس هى ماكاتش هى
اللى بابها عليا سك
واللى قالت هئتو لك
لانى عريان القميص
من يوم ميلادى لحد سنى
فاذاى وانا عريان ح اغنى
واذاى حبيبتى
ح اقدر اضمك واحضنك
وارقص على شط التمنى
والامنيات سرقها حوت الليل وشالنى
ورمانى فى بحور الظلام
موج يحط وموج يشيلنى
واما بوّش عضمى منى
رمانى ع الشط الغريب
للسحالى تلتهمنى
فاذاى وانا عريان ح اغنى
واذاى ح ادق بدف غيرى
وايدى عاجزة تدق دفى
واذاى ح ادفى
ارنبين سدرك بكفى
والتلج ساكن كل دمى
فمتطلبيش منى الهنا....!!!!
لانى مش حاقدر اهنى]