موت لوحدك

انتفضْ وارفع جناحك للخطر
ريشك ضعيف
لكنه قادر ع السفر
قادر يا زغلول السلام
تجمع يمام
أمة محمد والمسيح
يتعلموا لغة الحجر
لغة الطفولة
اللي عشان تراب بلادها بتنتحر
أما احنا
بمظلات حرير
ندَّارى من حبة مطر
***
موت لوحدك
وسلِّم المقلاع بدمك
للي بعدك
بس ما تنساش تقوله
وهو بيضمد فـ جرحك:
موت لوحدك
وقول لنخل القدس
ما يوطِّيش
وقول لأم الدرة
ما تبكيش
موت وسيب دمك يسقَّط
تنزل طيور وطنك تلقَّط
منه ثورة ما تنتهيش
ده اللي اتولد مُحتل ..
لازم يزرع ببذر الدم شجرة
فوق غصونها
الطير يعيش
موت لوحدك
ما تناديش
مين لقدسك ..
مين ..؟
مفيش
ذكرياتك ..
لعب يومك بين خواتك
اعتزاز ذاتك بذاتك
وانت شايل كراساتك
ملو شوقك في العيون
للحبيبة ..
والزيتون
كل دول
خنازير شارون
دمروهم فوق صراطك
يبقى ايه لازمه حياتك
لو ما كانت تبقى شهقه
تزرع الحريه حتى..
وانت فى لحظه مماتك
لو يقطعوا منك دراع
ارفع دراعك بالدراع
واحدفه فـ وش التحدي
اقلب موازين الصراع
وارفع المقلاع
وكون ..
صقر طاير بالجنون
واكتب بدمك ع الحجر
يا أكون أنا ..
أو لا أكون
قدسك حبيبتك
تحت ضغط الاغتصاب
تنزف جداول دمها
عناقيد غضب
عناقيد عذاب
وانت فـ ميدان المعركة
قلبك جريح
نازف نبي
نازف مسيح
نازف طفولة بتتولد
وبتندبح
لحظة ما تقدر يوم تصيح
فـ صيح وصيح وصيح
ومادمت مولود للدبيح
ادبح عدوك واندبح
ادبح وصيح
يمكن في يوم القدس
تولد لك مسيح.

انا عايز اقول ان حضرتك بجد حاجة عظيمة جدا
وانا كشاب صغير نفسى اتعلم منك الكثير
لان اى حد بيتمنى انه يلاقى حد زى حضرتك
وربنا يقدرك وتفضل تمتعنا بروائعك
نور المصرى