جابر سلطان
من أصحاب المنتدي
عدد المساهمات : 36 تاريخ التسجيل : 01/07/2011
| موضوع: الرسم بالمكنسه الإثنين يوليو 25, 2011 12:47 am | |
| وتصيح ديوك الفجر
فوق سطح البيوت
تصحى المدينة م السكوت
تدّن قناديل الجوامع
تملا المسامع
والتورمايات
تزحف من السكة الجديدة
م النزهة.. م المكس البعيدة
بين بيوت قدمت هدومها
وبيوت هدومها
لسة ع الجدران جديدة
وبين ضجيج الاتوبيسات
والسيارات
والكلاكسات اللى صوتها
يصحّى أهل الكهف
من نوم السنين
تفتح دكاكين الفطاير
والقهاوى
وترن أجراس العجل
باللبانين
تتمرجح الأمواج وتفرش
فوق خدود الرمل
أصداف المحار
ترقص نوارسها الرمادى
وتئن ويّا البحر
أنات الحنين
والكناسين
بالمقشات الكبيرة
ترسم على الأسفلت
وش نهار جديد
وتشطب الوش الحزين
لاكن حزن الأرض أكبر
من خطوط الرسم والتلوين
حزن البساط الطيبين
اللى عايشين الحياة
بين علامات إنتظار
وانا وانت بينّا الإنتظار
ياحبيبتى طال
من كام سنة
بضرب جناحى
فى الفضا الموجوع
من كام سنة
بحلم أطول الرُخ
واكسرله الضلوع
لكنى مش طايل سماه
مع انى بضرب فى الهوا
ريشى لأخر منتهاه
اه يا حبيبتى أه
من كام سنة بجمع طوباتى
والم دمعك بين عياطى
من كام سنة
مستنى أشجار المون
تطرح حنين
لاكن لسة الكناسين
بالمقشات الكبيرة
مش قادرة تشطب
من خدود الأرض
أوجاع السنسن
أه يا حبيبتى أه
من كام سنة بحلم بضلك
بحلم أحلك
من غطاكى التوت
من كام سنة بحلم وحلمى
�جوه الضلوع بيموت
من كام سنة
بفحت أساسات البيوت
بأقطع خيوط العنكبوت
من كام سنة
بحلم أجيبلك
قبل السنين ما تفوت
لاكن عناكب إفتح يا سمسم
إقفل يا سمسم
سرقوا منى وسرقوا منك
أخر ورق فى التوت
حبيبتى يا
غازلة الخيال أحلام
حلم الغلابة فى العشش
كتكوت
حلم الغلابة ..حلم
لو خطّى باب السبت
بين العرس… حيموت
فما تحلميش
وما تحزنيش
لكن حبيبتى ما تخافيش
طول ما لسة التورمايات
زاحفة من السكة الجديدة
طول ما لسة الكناسين
بالمقشات العنيدة
بيزيحوا أوساخ السنين
يبقى لسة الطيبين
موجودين
ويبقى فاضل ضحكتين
ضحكة يوم ما اقدر أحلك
من غطاكى التوت
وأفرش غيطانك
للى جاى ياسمين
والتانية يوم
ما ابنك يقولك توت
وتغنى بنتك للزتون والتين
وساعتها بس الكناسين
بالمقشات الكبيرة
ترسم على الأسفلت
وش نهار جديد
وتشطب
الوش الحزين | |
|
ماهر حامد
خادم المصباح
عدد المساهمات : 2082 تاريخ التسجيل : 07/05/2011
| موضوع: رد: الرسم بالمكنسه الإثنين يوليو 25, 2011 2:41 am | |
|
ياااااااااااااااااااااااااااابووووووووووووووي
طارت طيور الحب من غير ريش كسرت ازاز بلكونه من غير شيش جرحت شعور العالم المخفي
ياستذنا وحدة وحدة ايه الروعه والابداع دا بجد خدني على جناحك
وبجد انت هنا انتصرت على نفسك
وليسمح لي مشرف القسم الاستاذ
عزيز موسى
بأن اتطفل
واثبت هذا القالب الاكثر من مبهر
مع خالص تحياتي وودي
[/size] | |
|