القرد قال للحمار ...

أنا مش مناضل والنبي

انا حتي يمكن أجنبي

أنا افرق الحلم الجميل

والثوره تيجي لمكتبي

هزرت ويا المسلمين

والقبط باتوا في ملعبي

يامصر ليه عزمك ضعيف ؟

ملهيه تاكلي وتشربي

كل الكلاب مسكت وراك

وانتي اللي قاعده تهبهبي

ماتعضي إيد البصاصين

هوه انتي يعني حتغلبي ؟

ملهيه تكلي وتلبسي

وساعة اللعب التقيل

ألاقيكي بدري تفل .. لسي

ومش مهم العريانين

مدام ياطنط بتنكسي

..........

حمار شكا بغلته

للقاضي لم نصفه

يمكن غلط في الزلط

ولا اتوكس وصفه

طلع الميدان يشتكي

قام الميدان كسفه

هز الودان في الفضا

نزل الكلام الشين

ع الارض جه نصين

جابوا الوابور رصفه

..........

القرد قال للحمار :

مخك يعوز عمره

رد الحمار م الغيظ :

دي طيـــــــ .. ك الحمرا

الفهم مش كراس

ولا مشوارين ف الراس

الفهم حدوته

واللي يعوزه الناس

بنجيبه م النوته

سيجاره م الغاليين

مع بدلتين غامقين

مع حبتين زمره

نركب صلاح الدين

ونهد سور الصين

ماهي فوضي ياام امين

والسكر مش خمره

القرد قال : يابلاش

ديتها قطن وشاش

الثوره لما تعيش

ع الجلد والورنيش

تفيد بإيه جناحات

يفيد بإيه الريش

تسند إيديك الزير

مع حصتين تعبير

تلقي الامور بتصير

الشعب ويا الجيش

نرجع نروح الغيط

ونمشي فوق الحيط

ترجع حمير فحمير

تشبع نهيق وزريط

..........

القرد قال للحمار :

بختك .. بقيت حاكم

من غير ماتقلع شراب

أو حتي تتلاكم

جتلك علي الطبطاب

ياعم في الزيطه

جزره وقطمها غراب

ولبسنا في الحيطه

الحكم مش طوابير

كتفن سلاح ... دانه

الحكم له تدابير

تاخدك علي خوانه

الحكم يعني شعوب

عايزه قلوب دافيه

ماتسقش بالمقلوب

ماتسقش بالعافيه

صحيح عرفت كتير

وفيه حاجات خافيه

فيه صبر هد الحيل

وصبر وقع خيل

وصبر لما تشيل

يجيب لك الكافيه

..........

القرد قال للحمار:

الدنيا مش غابه

لا هيه بحر كبير

وحيتانه منسابه

ولا كل يوم تعبان

بيفك من جلده

لا تلقي فيها معيز

راكبه علي ديابه

لاتلقي فيها النيل

طالع علي شطوطه

ولاعنكبوت ع الشجر

طرطر علي خيوطه

السكه مترتبه

والنمل عارف مين

يدوسه بالرجلين

ويهد في بيوته

لاتلقي فيها الاسد

ياكل من الجيفه

لا يمشي في المنتزه

قدامه تشريفه

في الاصل اصل الاسد

مايكلش إلا ان شاء

لاعنده خزنة كبد

لا كومه م الامعاء

لا بياكل المستوي

لا يعرف النيفا

حتي الديدان في الحجر

بتبص من روسها

مفيش جمال عندنا

تجري وتدوسها

تتعب بطول الشتا

بتحوش المحصول

وتيجي جند الروم

وتبص في فلوسها

..........

القرد قال للحمار:

إعدل بكل ميزان

الدنيا من دا ودا

مش كلها ( إخوان )

متخفش من كترهم

دا الحظ زاع هزلهم

والدنيا سقت لهم

والقربه مغزوزه

الشمس طلعت لهم

وان حد راح عندهم

( جماعه محظوظه )

بيقولوا كنا وكان

والبيت عليه سجان

والله .. واحنا كمان

الدنيا كت بوظه

إديني عقلك يوم

خرجني م الالبوم

ومصر بحر يسيع

والبحر مش حيطيع

إلا ان عرفت العوم

عويم ؟؟ تعالي نقول

من غير سيوف وخيول

الحكم يعني اصول

قرآن علي روسنا

ينجدنا لو حسنا

لاكن عنيك السود

ماتعش بفلوسنا

وتبوسنا ماتبوسنا

مش كل شيخ مبروك

مش كل باب مفكوك

لا إحنا ملك يمين

ولا مصر ملك ابوك

..........

القرد قال للحمار :

النيل بيعطش ليه ؟؟

في حد جاي يشربه

دافع ذياده جنيه ؟؟

مش ماتش وحنلعبه

ونقول حنخسر ايه

ناصر .. زمان والنبي

كان هارش الفوله

يهود بتلعب هنا

بأمر م الغوله

شايف إيديها ياذوق

ولا عنيك حوله ؟؟

والغاز بلاش تديه

لحسن حنولع بيه

سامع ومش سامع

واللي يعوزه البيت

يحرم علي الجامع

..........

القرد قال للحمار :

بختك ياعم بخيت

نضفنا ليكو البلد

وكنسنا ليكو البيت

رصص رفوفك بأه

وريها للمخاليق

خللي البشر تفرزه

ولسانها يبقي طليق

الفتنه في المبتدا

عيال تكيد في عيال

مفيش عقول في الخبر

مفهش حاجه حلال

ولا قاعده حتحلها

صليب في حضن هلال

لو ماتوا كل القبط

في مصر ترتاحوا ؟؟

ولا ان فتحنا البلد

وهبه ... إنزاحوا

والله من بأسكم

تنداروا في نفسكم

الكل بسلاحو

عايز تفض الفتن ؟؟

يعود زمان الحال ؟؟

ده في قانون في الوطن

بلاها لعب عيال

..........

القرد قال للحمار:

صابتني فيك حيره

إعمل مايملي عليك

فضك من الجيره

إن كان حداك أنياب

الأكره جوه الباب

إفرز غيطان الغاب

وطلع النصاب

يابو اللسان كداب

يابو السنان عيره

صابتني فيك حيره

فضك من الالقاب

معدش فيه أعصاب

الثوره مش تغيير

كلبين فتيجي كلاب

الثوره في التحرير

قامت عشان مانام

الثوره مش تدبير

تاخد وتدي بكام ؟؟

الثوره حلم كبير

ماتحققوش احلام

الشاعر القدير

الاستاذ مهندس عطيه
قلم متمكن خبير

وللمرة الثانيه اتمتع معكم مع هذة الرائعه

دمت لنا مبدعا كبيرا
كل التحية والحب

شاعرنا الكبير قدرا ومقاما مهندس عطيه شواش

أسمح لى بتثبيت رائعتك المبهرة

ثم أعود ثانيا لجمال وروعة حروفك

دمت بكل حب وخير وسعاده

شاعرنا الكبير م /عطية
وكلمات لامست الواقع
واسقاطات ولا أوضح
تقبل مرورى
كل ودى

ماهر حامد كتب:

الشاعر القدير

الاستاذ مهندس عطيه
قلم متمكن خبير

وللمرة الثانيه اتمتع معكم مع هذة الرائعه

دمت لنا مبدعا كبيرا
كل التحية والحب

أخي الكريم الشاعر الجميل / ماهر حامد

أشكرك من كل قلبي وكل سنه وانت طيب

عزة الزرقاني كتب:

شاعرتي المقضله استاذه / عزه الزرقاني

من كل قلبي اشكرك علي لطفك وذوقك ادام الله الصداقه والاخوه

رمضان كريم

الاخ الشاعر القدير أستاذ / محمد ابو يوسف

شكرآ للتقدير من قلم اعتز به

كل سنه وانت بخير

كان لازم يعنى كلمتك علشان تفوق

صدقنى مصر نفسها تطلع لفوق

بس الادين متكتفه مش من فراغ

من ناس بتعلى مزيفه وعامله الفروق

تقبل خربشاتى ايها الرائع القدير

مهندس عطيه شواش

ولا حرمنا الله من ابداعك الجميل

دمت بحب