حبيبـــــــى

موضوع: حبيبـــــــى الجمعة سبتمبر 02, 2011 6:02 am

حبيبـــى
******
لو عشت العمر جنبك .........
عمر تانــــــى
أيام ......!!!
ساعات .... !!!
مش هتفرق لو ثوانى!!
ثانية ... تبقى الدنيا جنة.....
مش آهات.....
ورود.........
بسمات ...
أبقى عشت ياعمر تانى ....
بكل شوق جوايا ليك ...
ههديك ......
همسات ...
نسمات ..
دول حبايبك...... لو هعانى....
لوشفت حبيبى رووحى.......
بتطوف..
حواليك...
تناديك ....
ترقيك .....
فى عنيك ...
غمض ياحبيبى عشانى......
لو عمرى مش باقيله ...غير ...
ذكريات ..
زمن فات ...
ليه حبيبى....... أبقى أنانى ......
مديحة رشدى [/justify][/b]

أستاذتنا الفاضله مديحه هانم

تحياتى

من حسن حظى أن يتكرر معى المرور الأول على عملك

وعادة حينما يشدنى عمل من الأعمال ، أدرك

من خلال مرورى عليه ومراجعته قيمة هذا

العمل وإمكانيات صاحبه ، وحينما ألتقى مع هذا

الشاعر ـ على النص ـ أقوم بتوجيهه وتقديم النصح

له ليضع قدمه على أرض سليمه وبقوه فى مجال

الشعر ماأمكننى ذلك ، فهل تسمحى لى بتقديم قليل

من النصح ياشاعرتنا الفاضله ؟

إذا تفضلتى بالموافقه أرجو توضيح ذلك .

مع شكرى واحترامى سلفا .

أخوكم / محمد البسيونى

أنا منتظرة بشوق ... أكتب خواطر سيدى فأنا لست محترفة
أتمنى أن أتعلم فى وجودى معكم أكيد كل الخير
شكرا لك وأنا فى أنتظار نقد يرفعنى
أتمنى أن تمر أيضا على الخواطر لتوجيهى فيما أنا أفضل فيه ..فأبعد عن غيرة .....شكرا لك شاعرنا الكريم

القديره مديحه رشدى

تحياتى لكم ، وكل عام وحضرتكم بخير

بمجرد وصولى إلى المنزل دخلت على المنتدى

فورا ، وأسعدنى أن أجد ردكم بالإيجاب ، فالتوجيه

لايعنى بالضروره النقد ، وإن وصل لذلك فلا يعنى الهدم

ولكن يعنى البناء السليم لصاحب القلم المراد توجيهه .

والنقد عموما مطلوب فيه أن يكون نقدًا بنَّاءً حتى لايصاب

صاحب العمل بالإحباط ، هذا من ناحية الناقد ، أما من

ناحية صاحب العمل أو النَّص ، فلابد أن يكون صدرُه رحِب

متقبِّلا لأى توجيه ، إذا كان فعلا يريد التقدم والعلو وارتقاء

أعماله ، وأن يأخذ بالتوجيه ويعمل به تماما ،.

نعود للنص .. تقولين أنكِ تكتبين خواطر ، عموما كثيرا من

الشعراء بدأوا بكتابة الخواطر ، فهى الدرجة الأولى فى

سُلَّم الشعر ، فهذا ليس مأخوذا عليكِ بقدر ماهو مأخوذ لكِ

أما من ناحية النص نفسه ، فلابد أن تعلمى أن الفرق

بين الشعر والكلام العادى هو وجود موسيقى فى الشعر

عند إلقاؤه ، وهذا يستلزم سلاسة فى كتابة النص ـ يعنى

نعومه ـ أى لايكون هناك مطبات عند قراءة النص ، وهذا

مانسميه بعدم وجود كسور يعنى تانى ـ عشان ابسطها

لِك ـ على رأى هانى رمزى ، لايدخل فى وسط الشطره

مثلا كلمه نشاذ تُخرجك عن الموسيقى الموجودة بالنص .

نعمل مثال عملى :

بيرم التونسى كتب قصيدته الشهيره هاتجن ياريت ياخوانا

شوفى أنا رايح أقطعها ازاى وحاولى انك تقوليها لنفسك

مقاطع زى ماهى وتقفى عند الفواصل اللى أنا عاملها :

هاتجن / ياريت ياخوان / ا مارحتش لندن / ولا باريس

دا فى الشعر العامى ، طيب فى الفصحى ؟ نشوف :

إذا الش / عب يو / مًا أرا / د الحياة

شوفتى ياستى ، لو أنا قطعت الشطره مقاطع رايحه

تلاقى كل مقطع زى التانى بالضبط ، يبقى مفيش كسر

الى أنا قلت لِك عليه مطبطيب نجيب مقطع من النص

بتاعك ونقطعه برضه ونشوف :

لو عشت العمر جنبك عمر تانى .. أيام .. ساعات

قطعيها تلاقيها صعبه ، هنا تبان كلمة السلاسه

اللى أنا قلتها فى أول الكلام ، أنا رايح اعيد كتابة

الشطره دى بمعرفتى واقطعها وانت شوفيها وقارنيها

بالشطره بتاعتك بعد ماتقطعيها ـ دا لو عرفتى يعنى

تقطعيها ـ لأنها رايحه تبقى صعبه جدا وتضيَّع الموسيقى

من النص ، لكن شوفى لما أنا أعدِّلها :

لو هاعيش العمر جنبك عمر تانى ايام ساعات

تعديل بسيط خالص لكن ريَّح النُّطق ، وظهر الموسيقى

نقطَّعه سوا ؟ يالله :

لو هاعيش / العمر جنبك / عمر تانى / ايام ساعات

خللى بالك ( بدل كلمة عشت بتاعتك أنا كتبتها

هاعيش والألف بتاعة أيام أنا حذفت من عليها الهمزه

علشا الألف ماتتنطقش ) شوفتى الوزن خف ازاى

والموسيقى ظهرت كأنك بتغنيها ، سهله جدا مش كده

وجعت راسك ؟ معلهش بس جربى وماتزهقيش واشوف

النتيجه ، حاولى تعيدى كتابة النص وكأنك بتغنيه .

سامحينى للإستطاله ، محاضره بفلوس ، بس علشان

خاطرك انتِ ببلاش .

دمتِ بكل الخير ، وإلى أن نلتقى مع نص جديد

تقبلى تحياتى .

يااااااااااااخبر ابيض .... محاضرة راااااائعة سيدى

أشكر لك تعبك معى وان شاء الله ترانى افضل ويبقى البركه فى حضرتك ... اكتب سيدى القصائد النثريه والعامى والفصحى على أد مقدرتى ... ان كنت ترانى افضل فى شىء عن الآخر ارجو ان اتعبك اكثر وتوجهنى ... لى فى خواطر الكثير وفى الباقى بعض الأعمال
أشكر لك تعبك مرة اخرى..... وسأجعلها محاضرة مهمة اقراها دائما ...لأتبع ماتقوله ...... شكرا جزيلا لحضرتك

لاشكر ولا حاجه ياستى ، المهم العمل بما كتبت لأنه البدايه الصح

تقبلى تحياتى

لو هاعيش العمر جنبك
عمر تانى ايام ساعات

مش هتفرق لو ثوانى
تبقى جنه مش آهات

كل همسه منى ليك
كل نظره بتناديك

كل شوق جوايا زايد
ينطِفى وانا بين إيديك

**************
كملى الباقى على الوزن ده وورينى ؟
**************
بهديك ......همسات ...نسمات ..
دول حبايبك...... لو هعانى....
لوشفت حبيبى... رووحى.......بتطووف..
حواليك...تناديك ....
ترقيك .....فى عنيك ...
غمض حبيبى.... عشانى......
لو عمرى مش باقيله ...غير ...
ذكريات ..زمن فات ...
ليه حبيبى....... ابقى أنانى ......

يااارب أستاذ/ محمد بسيونى ... مجهود حضرتك يكون بفائدة
تسلم شاعرنا الكريم

راجع لك بعد ماخلص على ( إسمَك ) الأول

تقبلى تحياتى

لا الموضوع كبر واحلو على الاخر

وعشان الفائدة تعم علينا كلنا

ونستفاد من خبرة استاذنا محمد البسيوني

فتحية للاستاذة مديحه على هذة الروح الطيبه

ومعكم اتابع واتعلم

ملحوظة

تم التثبيت بواسطتي

موضوع: حبيبى الإثنين سبتمبر 05, 2011 10:33 pm

الاستاذ محمد البسيونى
دمت لنا خير ناصح وناقد
وثق بأن كلمات نقدك هى هى وسام على صدور كل منا عشت ودمتم لنا
تقبل تحياتى
علاء عبدالحق المازنى

استاذى / شاعرنا الكريم ماهر

شاعرنا الكريم فعلا الموضوع كبير بقدر عالى جدا ...

مأراه أكيد أن الله يحبنى ... أكرمنى بوجودى معكم

ثم أكرمنى بمن يصلح قامتى

أشكركم من كل قلبى وأشكر معلمى الفاضل

و سأصلحها وانزلها كما يرشدنى بعد قليل ...

شكرا من قلبى يملا كل الوجود

موضوع: َ الثلاثاء سبتمبر 06, 2011 6:44 am

لو هاعيش العمر جنبك
عمر تانى ايام ساعات

مش هتفرق لو ثوانى
تبقى جنه مش آهات

كل همسه منى ليك
كل نظره بتناديك

كل شوق جوايا زايد
ينطِفى وانا بين إيديك

نفسى اعيش وانا ساكنة فيك
والقَى قلبى بيراعيك

تِبقَى لِى همس الشفايف
حتى روحى هايمَة بيك

مش تكون لى حتَّه منى
لأ ياعُمرى .. تبقَى كُلِّى

والشعور اللى يلازمنى
لو خِسرتك .. إيه فاضل لى !!؟

مديحه رشدى

شاعر عدد المساهمات : 220 تاريخ التسجيل : 14/07/2011

الشاعر / مديحة رشدي

يا بختك لاقيتي اللي يعلمك

وإيه النتيجة ماشاء الله

عموماً إحنا إستفدنا علي حسك

من أستاذنا الكبير / محمد البسيوني

بارك الله فيكي وفي أستاذنا الكبير