أنا والحمار

موضوع: أنا والحمار الخميس أكتوبر 06, 2011 7:27 pm

(أنا والحمار)
زعل الحمار واتقمًصْ وقال خلاصْ حارتاح
م الحمل ضهرى اتقرص طول الزمن سوّاح
ولا كنت مرّه كبيرعلى عٌمْده واللاغفير
وباشيل بلاوى كتيروباساعد الفلاح
,,,,,,
عاتبْ عليك يازمان يالىّ خليت بينا
والمهْنه فى القرآن للحمل والزينه
عيشنا وشوفنا الصين والهند متفاهمين
عملوا بديلنا اتنين بكلاكس وسرينه
,,,,,,
جابولنا توكتوك وزرعوا فى البلاد شرٌّه
مراثون سباق للعجًلْ والكل بيْـفرّه
ولا عاد يفيدنى نهيق ولا كرْباجين ع الريق
وكنت عمرى ما اطيق أبعد عن الكارّه
,,,,,,
فى كلّ مطلع يبان للكل توريطى
ومزاجى أحمل هموم الدنيا فى غبيطى
وبأنام على حيلى يحرسنى طول ديلى
ساعتين راحه ف ليلى والفجر اروح غيطى
,,,,,,
لكن عزايا انىّ مش وحدى بقيت برّه
ولا برْضه وحدى الىّ عيشته فى البلد مُرّه
صاحبى الىّ مات ميت سنه يصحى يلاقينى معاه
والمولى صحّاه يشوف الاكل فى السّـُرّه
,,,,,,,
فيه زيىّ خلق كتيرفقدوا الصلاحيّه
وناس يوم التحرير ماتوا بدون ديّه
لو تعملوا بأصلكم مابقاش رخيص عندكم
خلــّونى اعيش وسطكم ماتفرّطوش فيّه
,,,,,,,,
دانا الوحيد الىّ ساكت من يوم التحرير
لا عملت يوم اضراب ولا ائتلاف لحمير
مع ان كل البشر زى الجراد وانتشر
حتى اللىّ كان م الغجرطمعان نشوفه وزير
,,,,,,,
الكل عامل زعيم حاتكفىّ مين يامصر؟
حتى النظام القديم شارك فى يوم النصر
ياحسرتك يا أصيل حاتعيش معايا ذليل
ونشيلوا حمل تقيل وننام سوى م العصر
,,,,,,,,

الكبير قوى أخويا الحج سعد

والنبى آخر جمال ، والحمار بتاعك دا بو الفصاحه ، ومخه كبير

وفاهم فى كل حاجه حتى فى السياسه ، ويمكن فاهم اكتر

من ناس كتير داخلين الإنتخابات اليومين دول .

تحياتى لك أخى الفاضل ، نص جميل بحق

دمت بكل خير

فكرتني بمقوله لتوفيق الحكيم عن لسان الحمار

عندما تحدث الحمار على لسان توفيق

قال الحمار

انا جاهل

وصاحبي ذو جهل مركب

متي ينصفني الزمان واركب

مساء الفل يا عمنا

شاعر عدد المساهمات : 220 تاريخ التسجيل : 14/07/2011

الأستاذ الشاعر / سعد الشرقاوي
صحيح ياما في الحمير مظاليم
هذا الحمار جميل ومثقف ويستحق التقدير
علي الأقل أحسن من اللي عايزين يخربوها
كل شوية عاملين مظاهرات فئوية وفتن طائفية
أما حمارك ده راجل مسالم وعايز مصلحة البلد
وأخيراً هكذا أنت تبدع دائماً