لسَّاها بتدوَّر
على واحد يشبهنى
شايل على كتفه سنين
عمَّالة تسقَّط منه
طالعة من حضن الأرض
شيطانى
ملهاش صاحب يحميها
مسكين
..
عمَّال بيلملم ف سنينه الواقعة
لساها بتدوَّر ف الشارع
والشارع
مبقاش
يعرفنى
من بعد ما وقعتْ منى ملامحى
وتاهت وسط حوارى كتير
عمَّالة تزَّرع ف بيوت ..
لسَّاها .. بتدوس على راس الشارع
علشان تتحكم فيه ..
عمَّالة تخرَّم ف دماغه
وتكتب فوق كل حيطانه كلام مش مفهوم
عن واحد يشبهنى
شايل فوق كتفه سنينه
عمَّالة تسقَّط منه
وهو..
عمَّال بيلملم ف سنينه
كنت فاكرها هتفرح بىَّ
حطتنى ف علبه !
لفتنى ف ورقة جرنان
ورمتنى بعيد ،
على ناصية شارع مسدود
كل اللى يعدِّى ويقرانى
يحط إديه على خده !