شمس قالتلى بكرة حاتحلى
وتلقى الدنيا بقت افراح
خف دموعك مش مستاهلة
ولا باينك غاوى جراح
قلت يا شمس ده احساسى
انا مش قادر يوم اخبيه
حلم حلمته وواجع راسى
حلم باحبه وبتحبيه
بصى يا اطهر قلب قابلته
انا مش قادر اخبى الامى
مية نيل مصر اللى شربته
خلت مصر ملاك احلامى
واسمعى بقى قلبى الموجوع
لما يلاقى نفسه فى غابة
غابة لا نافع فيها دموع
وكل مافيها وحوش كدابة
بقى دى بلدنا يا شمس انا وانتى
اللى سهرنا نحلم بيها
يبقى دموعى اكيد من خيبتى
بس انا ابكى برضه عليها
شوفتى حلاوة نجم فى شعره
كان بكلامه بيصحيها
خد مليون كرباج على ضهره
وقدم روحه عشان يفديها
وانا بالاقيها يا شمس سراب
شىء مش ممكن اوصف فيه
وانا لو خاين او كداب
كنت سكتت بالف جنيه
بس حاحاول انى اتفاءل
بس انا عارف من غير فايدة
لما القاضى يكون القاتل
يبقى بلدنا ازاى عايدة