كفين

خبطت كفين على كفى
ورزعت دماغى فى الحيطة
لا كفوفى خبطتها بتشفى
ولا ليها نتيجة غير زيطة
واهى كده بالظبط البولوتيكا
مع بس شوية ماسكات
وبكرة حانصبح انتيكا
موجودة فى كل البوتيكات
لو حد فاهمنى يقول حاجة
حسسنى ان انا مفهوم
مش عارف حاسس بسذاجة
وانا باشرب بيبسى بخرطوم
انا حاسس انا سخن باخرف
انا شايف العفاريت دى لواحدى
حلفتك جاوب لو تعرف
ماعرفتش عديها وعدى
كانوا قالوا زمان ارمى البذرة
واسقيها وارعى تنول طرحك
وتلاقى البذرة بقت شجرة
وفروعها تضلل فى مطارحك
بس انا بقى كل ما ارميها
واسقيها برضه معندانى
ابدرها بقمحى والاقيها
بتقولى مبيدك سرطانى
الارض بقت طارحة عماير
تتهد على دماغ سكانها
والعيب مش فيها دى ضماير
ماكانتش عارفة اماكنها
عمال مابقاش ليها مصانع
قال ايه مصانعهم خسرانة
وبيلعبوا فى الوقت الضايع
صبحوا من غير ولا شغلانة
فيه حاجات جوايا بقت سايحة
مش عارف ايه اللى بيحصل
بالمحها جاية واقول رايحة
واستنى واقول يمكن توصل
ولعلى سيجارة بلا وكسة
نحرق صدرنا يمكن ينفع
ونموتقبل ما تحصل نكسة
والميت مش ممكن يرجع
والله بجد انا مابانامشى
والخوف من بكرة بيقتلنى
لو ينفع لاسيبها وامشى
ولا ان صهاينة تهزمنى