رسالة الى سيادة الرئيس

رسالة الى سيادة الرئيس
يا سيادة الرئيس ...
يا زعيم ...
إنت طيب ...
بس مصر – اللحظة دية- عايزه واحد .. مش رحيم
عايزة واحد بس راضع.... دم امه
حد واكل لحم جسمه
كل حته ف - البلاد دى - جوا دمه
وال عدى .. وال صاير.. وال جى – يبقى همه
عيزه قاسى .. ف الصميم
حد يقطع فى الطغاه
حد يعصف بالجناه
حد يبنى بإيد ...وتانية ع السلاح
حد يمسح ف الجراح
******
انت حالم...
بس شعبك – بعض شعبك-
عايزه واحد مش حليم
يا زعيم ..
مصر عايزه – بعد ثورة-
عايزه حد يكون لئيم
ريح وتعصف بالهشيم ...
بالجدور السارحة تغرز فى الجحيم
بس انت ... كالنسيم...
******
يا زعيم ..
الرياسة مش خنوع
والقيادة مش خضوع
الرياسة والقيادة عايزه قلب يعيش ف عالم ....
تانى ... اكبر م الضلوع
قلب نابض ... بالصرامة
بالجراءة والخشوع
الليالى السودة طالت.. راح تفيدها ايه ... شموع
والهموم النايحة صالت...راح يفيدها ايه ... دموع
والطيور الجارحة حامت..
ف الحوارى .. والمزارع.. والمصانع .. والنجوع
مين يصيدها .. يا زعيمنا.. الا ماهر
مين يصيدها ... الا شاطر
مين يرجع فرح امة .. الا طاهر
******
يا سيادة الرئيس ....يا زعيم..
إنت مركب وسط بحر
بس موج البحر عالى .. وانت سهل
وال سهل عايزله نهر
بس مصر..!!
لو ناسيها... بس إسأل قول يا دهر...
راح يقولك كل حاجة..
لو ما ردش .. قول يا قهر
حد شاف ف الدنيا دية .. قد مصر
انت عاقل.. بس قابلك سابوا تركة م الهموم
لو توزع .. يوم بيوم
تكفى عمر...
سابوا تركه عليك كبيرة
خلطة ممزوجة بإيد شيطان مريرة
والحكيم ايه راح يفيده... لو يجادل وسط جهل
******
يا زعيم .. انت عاقل ..
والحكيم وسط الديابة.. ايه هيسمع
لو ف ايده الف حكمة .. مش هتنفع
الديابة عايزه سبع ..
الديابة عايزه مدفع ..
لما تسمع صوت أسودها.. لحظة تخلع..
بس انت .. مش هقولك .. أصل تزعل
ولا اقولك .. ايه هيمنع
انت طيب..... بس طيبتك.. مش هتردع
******
يات زعيم...
انت شعبك ال جابك
إنت كل الشعب حِسبة .. من حسابك
انت ملك الكل ... ما نتش ملك اهل
والطريق الصعب يبدا خطوة صعب
ثم خطوة .. ثم يبدا ... كله سهل
يبقى ليه الخوف فى عينك
يبقى ليه الرعشة باينة فوق جبينك
يبقى ليه الرعب واضح.. بين قرارك
انت طيب ... بس طيب دى لحالك
اما احنا ... ايوا احنا..
احنا أكبر من خيالك
احنا اكتر من كيانك
******
يا زعيم ..
الرياسة مش يا دوب حبة كياسة
مش يادوب حبة سياسة
الرياسة عايزة قوة
عايزة سُلطة
عايزة قلب يشد بكرة للنهاردة
عايزة عقل يخش قلب الضلمة يخلق.. الف شمعة
عايزة فكر يلم نور الشمس .. ثوب
عايزه غنوة فى القلوب
عايزة مشرط .. بين ايدين جراح محنك
عايزة مدفع يبقى جنبك
طلقة تقتل بيها واحد من عدوك
طلقة تحمى بيها ارضك
تحمى شعبك
تبنى بيها مجد (مصرك)
******
جمال نصير فى 3/2/2013

ماهر حامد كتب:

يسلام ياستاذ

جمال نصير

قصيدة جادة

فيها لوم وعتاب
ونقد بناء وادب حقيقي
ياريت كل الشعراء زيك

مجرد عربون مرور

كل الود والتحية

وادعوك من هنا

متابعة اعمال الزملاء

بإستثنائى


كل الود

اخى ماهر ... مرورك تشريف .. واعترف بان هناك منى تقصير .. ورغم التقصير ولكنى متابع للجميع .. وكلهم هنا اغنياء عن التعريف.. ورغم ذلك لك ولكم منى جميعا كل الشكر والتقدير

Gamd Absher كتب:

كلامك صح وعال العال
ولكن مين بيسمع
وناس مش عاجبها راحة البال
عايزه نار وتزود فيها الاشتعال
يعمل ايه فى جبهة خراب
بتشعل فى عقول الشباب
وبيحشدوا ليولعوا البلد
ويخلوهادمار وعيشة كلها
هباب ف هباب

مشرفتنا الكريمة Gamd Absher.. اهلا بك وبمرورك الجميل.. شكرا لك ذلك التشريف

محمود جمعة كتب:

أخي الشاعر الرائع جمال نصير

أحييك علي حسك الوطني وخوفك علي بلدك ورئيسها

كتبت فأحسنت وأمتعت

ولكني أختلف معك تماما في ان الرئيس ضعيف .. أو أنه

حليم زيادة عن اللزوم بالعكس تماما أخي الكريم

الرجل الذي يأتي للحكم والجيش والشرطة والقضاة والاعلام

والازهر ودار الافتاء بالاضافة لنخبة فاسدة ودولة عميقة مجرمة

ويستطيع البقاء وأنجاز تحويل مصر لدولة مدنية وانهاء حكم

العسكر ثم أنجاز الدستور رغم ما اشعلوه من حرب شعواء

ثم السفر هنا وفي طريقه الي تكوين الركن الثالث للدولة وهو

البرلمان .. وعندها سيختلف الوضع تماما

أخي الكريم هم يريدون جر البلاد الي حرب شوارع بأستفزاز

شباب التيار الاسلامي بمحاولاتهم اقتحام القصر وحرق المسجد

حتي لا تتم الانتخابات ابدا .. والقوة هنا ليس الانصياع لهم

بل بوضع الهدف أمام العين والتركيز عليه ..هم سيخسرون

الانتخابات لا محالة والشعب كرههم .. لقد اصدرت اذاعة البي

بي سي نتيجة استفتاء قال ان ٨٢ ٪ من الشعب يكره جبهة

الانقاذ ويعتبرها جبهة خراب .. صدقني هذا ليس ضعفا

ولكنه قفزا بالبلاد الي اهدافها

الصبر في مثل هذة المواقف هو القوة بعينها ..

تحياتي أخي الكريم وتحية لحبك لهذا الوطن العظيم

كن بكل خير

اخى فى الله الحبيب الى قلبى محمود.. انا لا اختلف معك وحتى ان كنت انت على صواب فانى اقدر واحترم رأيك لانى اثق فى عقلك واخلاصك وتدينك ووطنيتك ... انت محق ولو تعرف كم عانيت كى انتخب الزعيم لعذرتنى... ولكن اخى الرجل معه الشعب .. بدليل بيان ال ب ب س .. ومعه الحق .. ومعه قوة اسلامية ترهب الشيطان نفسه.. فلما لا يقاتل هؤلاء.. لو كنت انا مكانه لوهبت نفسى للشهادة فى سبيل الله والوطن الذى اختارنى.. لا ان اقف هذا الموقف الطيب والبسيط والمتواضع امام الكل .. انا ارى فى مصر سيرك او مسرح عرائس .. يحركة القلة الفاسدة .. وهو منتظر ؟؟ ماذا ينتظر... خرج من قبل ببيان وخرج معه نائبه بانهما اطلعا على جزء من مخطط الانقلاب على السلطة .. وفى نفس اللحظة دعوهم للتحاور .. الم تكن مصر اعلى من هذا؟ مصر يا اخى تريد فرعونا حكيما .. يمسك بيد من حديد وبالاخرى يصلح .. ولا تقل له انه لا يثق فيمن حوله .. الشعب كله معه .. الصندوق ... هو يسير خلف الاحداث لا قبلها.. يقرر ثم يفكر .. فالرسول صلوات الله عليه كان يستعين بأهل الخبرة قبل اهل الثقة فى اموره.. ومصر ليست قليلة الشأن .. لا مجال لارتعاش ولا ضعف ..واخيرا تقبل احترامى وتقديرى