قصيدة ( خيوط الفجر)

خيوط الفجر

======

ياحلوه والهوى شالِك ..

تعالي بخطوتك لـيَّه

وأسمع رنِّ خلخالك

ويحلى لي / ويحلى لك ...

شعاع الشمس خُضرتنا

وضلِّتنا تكون إيدك

وريدي يطير وبيحلق ..

يجيب عيدك

وانا عيدك

نحقق كل أحلامك

وانا والدنيا خُدامك

جبينك يعلى يعلى لفوق

تسوقي الكل قُدامك

*****

ياحلوه والضفاير ليل

عيونك نور

دفا صافي بيمحي الويل

حنانك فيض

يزيد عن وسع كل بحور

ياابو منصور

ياابو محمد

ياابو جرجس

يابيرم / يآ صلاح ياجاهين

يانجم وخالنا أبنودي

ياجندي ف بدلته الميري

يانخله شامخه لحدودي

يامولودي اللي جي بكره

أنا باكره خيانه وغدر

وباكره مِن يفضِّي القِدر

باعيش وأصون حدود أدبي ..

فيعلى القَدر

وآهـ من نار بتولع في الشجر والنخل

وآهـ من عار / جبان بايع

وآهـ من واد / شَقِي صايع

بيحلم إنُّـه يشنقنا

ويوم ماأبوه يغور عنَّا ..

يكون فوقنا

ورافض يوم نقول فوقنا !

لكن هانت / خلاص فوقنا

ونبض الكل قام يصرخ :

ياحلوه والهوى شالِك ...

خلاص هانت / خيوط الفجر بتشقشق

ومش ح نداري أشواقنا .....

فَضُـمِّينا

وبينا ترنِّي خلخالك

*****

ياحلوه والضلام حالك ...

مايللا تعدلي حالك

يخاف الكلب لو جالك

يدوب الكل ف وصالك

ماكنَّا زمان نقول : مالك ؟

مابتجاوبيش !

فعيشي واحلفي إنَّا ..

بجد نعيش

سنين ياما نعيش في الهيش ..

وبيدُسنا بِرِجْله البحر

وأولادنا بتتربى / ليوم النحر !!

وكنَّا نقوم وبنزمجر ..

نلاقي السحر / فبنخنع !

ياحلوه قومي م المَخْـدَع

بلاش النوم / في بحر غريق ودوَّامه

ولابنرفع في يوم هامه ..

ولابنقدر كمان ع العوم !

*****

ياحلوه والهوى شالِك ...

باشوف البرَّ مش لاقي ..

عليَّه هدوم !

ياحلوه اتناولي مجدافك

دا مش وقت الجدال واللوم

إيدينك فين نشوف بكره وكمان بعده ..

نشوف حطِّين ؟

ياحلوه والولاد ثايرين

يغيروا عليكِ م الأهطَل

بعاكسك يمنعك تمشي

وحتى النسمه تتعطَّل !

وناسي إنهم ليكِ ..

دراع ومتين

وناسي حفظهم ليكِ / ليوم الدين

وناسي النخله ف حدودك ..

بتطرح حق

وناسي الزرعه ف غيطانك ..

بتصرخ لأ

وناسي النبض ف عروقي ..

خلاص انشق

وناسي الخاله بدويه

تقول كان إيه جرى ليَّه ؟!

ح احط الإيد في أسْـخَم شق !

وباسمعها ..

وابور في النبض بيولَّع :

يانخلي وزرعي إتِّـحْدوا

حرام نركع لأهواءنا

وعلُّوا الهامه والأعْلام

وشوفوا إيه هناك قُـدَّام

تزيحوا بإدكوا كل ضلام ، فنِـتغنَّى :

ياحلوه والهوى شالِك ..

جميع الكون ..

بشوق بيغنِّي لوصالك .

عادل عثمان الحجار

===========

روعه يا استاذ عادل

وجبة دسمة ومشبعة

وشحنه فتيه

من طراز

الله عليك ياشاعر

ومعلش انا داخل يإيدى فاضيه

بس اوعدك بالعودة ان شاء الله

صباح الفل

صباح الورد أخي الحبيب الشاعر الرائع / ماهر حامد ...
ودائماً وأبداً مرورك وتعليقك الأبهى والأروع

نص جميل معني ومبني ان دل فيدل على شاعر متمكن من ادواته

تقبل مروري واعجابي

الشاعر الجميل الأستاذ عادل عثمان الحجار

أنحنى لحضرتك احتراما على نصَّك الرائع ، وعلى

تحفتك الأدبية التى أخذتنا لنعيش فى قلب مصر ،

وواقعها ، ودعوتك لتلاحم أبنائها ..

ياابو منصور

ياابو محمد

ياابو جرجس

الله عليك ، وعلى مصر ، وعلى شالها

نص أكتر من رائع أخى الفاضل .

تقبل تحياتى واحترامى .

» قصيدة ( ليه ؟؟ )
» قصيدة ( ايامنا )
» قصيدة ( المراية)
» قصيدة (شفت الشمس ؟)
» قصيدة قومى يا مصر