سلسلتك الفضه وماشالله الفيروز
بين ارنبين سدرك..طيار جوه مطار
صحونى من تلجى
نسونى انى عجوز
خلونى اتمنى اكون لهم طيار
يا شطفه الجمار
يا توته مغسوله من ميه الامطار
عطر النساء له شذا
فى قاروره البتارين
اما انتى عطرك ندى
من غابه العطار
..........................
(2)
ست البنات يا احلى..احل
الحب مش مرود وكحل
تتكحليه...وتدمعيه...وبعد دمعك
تشطفيه
الحب يا ست البنات
شهد نحل....فاستطعميه
واتعوديه
ولما نحله يقرصك........اتحمليه
........................................
(3)
فى التروميات يكتر كلام البنات
وتبان حيرتهم ع الوشوش
فى التروميات البنت تسأل بالرموش
سؤال عنيها ما تسألوش
البنت طول الصيف ربابه
وفى الشتا تغرق......تبوش
يا نورس الاحلام مدينتك
بواباتها نحاس رمادى
عشت عمرى استنى عشقك
يزرع الاحلام فى بابى
عدى عمرى ما حستوش
والبنت تسأل بالرموش
سؤال عنيها ما تسألوش
البنت طول الصيف ربابه
وفى الشتا تغرق ......تبوش
كل يوم الكحل يسأل فى المراود
امتى عين البنت ما تغنيش عياط
امتى البنات الفرح لو جالهم يهاود
وتصالح الدمعه الرموش
امتى امتى
ما يبشوش....ما يبشوش... ما يبشوش