صرخة

لحظة صمت نهيتها بصرخة
ايه اللى بيحصل من حواليه
البنى ادم اصبح فرخة
قال ويقولوا احنا فى حرية
دم اخويا سال قدامى
وانا ماقدرتش حتى انى ابكى
سودوا كل نهار احلامى
وحبسوا كمان كل اللى بيشكى
وانا يا مشير قررت اتكلم
يسقط يسقط حكم العسكر
اقتلوا فينا ومش حانسلم
زيدوا بشاعة حانصمد اكتر
وانا فى الاخر عارف نفسى
اما حاموت او اكون مسجون
بس حاقول كل اللى فى نفسى
حتى ان قالوا ان انا مجنون
مصر بتاعتى مهما حايحصل
وانتوا مناصب ماسكة كراسى
وعشان كرسى تصيب وبتقتل
طيب نشن بقى على راسى
حتى ان مت حاتلقى مكانى
اقلام حرة حابة بلدها
وجوة فى قبرى حايبقى ميدانى
نار مش ممكن يهدا رمادها
عمرنا واحد وده عارفينه
والمكتوب مكتوب من بدرى
واللى بيفقد برضك عينه
هو ده قدره وهو ده قدرى
وانا باحلفلك عمرى ما حاسكت
لو قطعت فى جسمى نسايل
دمى حايسقى الارض وتنبت
تطرح فيها احلى سنابل
تطرح جيل ماعرفش الغش
ولا طمعان فى فلوس ومناصب
ياللى طلعتوا بمليون وش
ارضنا ليها مليون صاحب
ارفع ايدك وادعى معايا
ادعى لربك هو القادر
زى ما كرم مصر فى اية
ينصر فيها الشعب الصابر