لوُحة رسم
جاب الولد اللــوحه ف إيــدُه
و فــردهــا لأســتــاذ الـرســم
راســم لوحــه .. لعـالَم وردى
ولا كاتــب عنــوان ولا إســم
والناس فيه عايشه ومبسوطه
ولاقيـه اللقمه .. ومش تعبـانه
وراسها لفوق كرامتها مُصانه
بتقــول بـكروشــها المليــــانه
القوى مش بالصوت.. بالجسم
.
وبــألوان جــذّابــه.. بتِــسحر
راسم شمــس وخُضره ومَيّـه
وبال مرتاح والصحَّه عفيــَّـه
يعنى الشكـل العام .. حدّوته!
.
الأستـــاذ بص على الصوره
بــوِّز.. كَشَّــر.. دمُّــه اتعكـــَّر
شاط ف الواد من غير مايفكر
و زعق .. بالصّــوت الحيّانـى
رسمـَـك كلُّه .. غِش ف غِش
إنت عايش لى ف عالم تـانى
راسِم ناس فارديــن الوش !!
ومافيش واحـد حتى مكشّـر!
كل الناس مبسوطـه بتضحك
وف أعلى مكان فوق الصّوره
يعنى اللى افهمُه أنا من رَسمَك
إن حالتــهُم كــــده .. مســتوره
ومكتََّــر فى اللـــــون الفــاتح
ومزوّد فى البمبى والابيـض
دا البمبي .. بقى دقــَّه قديمـه
والأبيض .. مبقاش له قيمـه!
مالُه اللون الاحمر أو الاسود ؟
.
قــال للأستاذ : زعـلان ليـه؟
قوللى :غلطت انا بس ف إيه؟
راسم لــوحَه .. قيمَـه وسِيما
فيها التّرسـو .. والمقصــوره
واللى تناسـبه كراسى الترسو
راسمـُه بإيدى تحت الصـوره
واللى يناسـبه الــدور العـالى
حطــّـيته فـوق فى المقصوره
قال له : يا إبنى عيش الواقع
إزاى تدخــل ع المــقصــوره؟
سيــب العالى لأهــل السَّــطوَه
سِيبــُه .. للهيـمنــه والقـــــُــوَّه
للى بكــلمه يـــهدُّوا العـــــالم
وحياتــُهم صواريـخ ومـدافـِع
.
نَــزّل كــل الــناس دى لتـحـت
خللى الكُل يعيش فى التّــرسو
عــالــم ناسُــه قليلــة البخــت
جايـز .. مُش حاسِّين بمهانه!
وامَّا يشوفوا الرسم .. يحِسُّوا
و امسح لى البَسمه بأستيـكه
و ارسم فى مكانها التّكشيره
وسيب اللون الاحمر والاسود
وامحى اللون الابيض م الصـوره
علشان رسمــك يبقى قصـيده
رســــم الشعر دا لــه أسرارُه
لــو زاد فيــه اللــون الفاتــح
تبقى القافيه أكيــد مكسـوره!
إتعلــم مــن عــمّو "أمــين"*
لمّا رسم شعرُه ف " سبّوره "
خللا اللـون الاســود متسيــّـد
واللون الابيض برّه الصوره!
* الشاعر/ أمين عثمان من ديوانه ( سبوره )
الثلاثاء يونيو 28, 2016 11:39 pm من طرف الشاعر عبد الناصر رجب
