محمد البسيوني
المدير العام
عدد المساهمات : 1501 تاريخ التسجيل : 18/07/2011
| موضوع: (آهات من القدس) القصيدة الأولى فى ديوان كرابيج الأربعاء أكتوبر 24, 2012 8:51 pm | |
| [size=24]
. آهـات من القدس
سنين.. وجرحِـــك يوجعنى واصــرخ ولا حـَــد سامعنى
وهواكى يا فلسطـين جاينى
جايب معاه م القــدس آهات
آهة رضيع عــلى صدر امُّه
شـايل ما بين لفــّته هــمّـُه
مسكين ..لا يعرف إيه إسمُه
و لا لسَّه داق طعم البَسمات
و آه
لزهــــره فى عِـــــز شبابها
خــايــفه تفوت عتـــبة بابها
و إسرائيل طالقـــه ديابـــها
تنهش وتِعتِدى ع الحُرمات
و آه ..
صرخــة جـدع شايل قََـَدَرُه
على كف .. والتانى لحَجَرُه
و الموت صـديق و بيِنتظرُه
و نبلتُــه بتكتـب .. بطُـولات
وآه ..
مــن أُم .. صرخِتهــا بحُـرقَـــه
وتعيش تموت ماهى مش فارقه
بيتهــا .. خَـدوه نهب وسِرقـــه
و زتونهـا شجرُه جَف ومات
و آه ..
من أب ماشى وإبنُه معــاه
قابله رُصاص الغَــدر رمَـاه
حاوِل بصــِدرُه يحمى ضناه
وف لحظه عُمر الاتنين فَات
و آه ..
لـشيخ بِسبـحَـه و سِـجـّـَاده
ســـاجد لــربُّه .. فى عــبادَه
على راسُـــه واقفين جـلاَّدَه
بدبّابات وســلاح وِدانـــات
و آه
آه بِـتـِبعَـتـهـــــــا كنــيــســــه
بِتقول ل "جرجس" ول "وِيصا"
أجــراسى م الحزنِ حبِيـســــه
ما بقتش أَسـمع لهـا دقــــــات
و آه
آه جرِيحــه .. منِ الأقــصى
بتقول لى إِوعَى ف يوم تِنسَى
الـدنيــا ســامعـانى و بـَصّــه
و راضـيه حــقـى برّه يبـات
و آه .. و آه .. و آه دبـحتــنى يا قـُدس آهـاتــِك
ولا حــد فينا ف يوم غاتـِـك
فين العرب ؟ فين اخواتِك ؟
بيدافعوا عنِّك بالشّعارات !!
إصحـُـوا و فــوقـوا يا بشـر
دى "القدس" فى عِز الخطر
هاتقولوا إيه بُكره ل"عمر"
مفتاحها ضاع واحنا ف سبات؟
هاتقولوا ل"الأيّوبى "إيه
بَعـدك .. رضينـا الذُّل ليه؟
سبنا فلسطـين .. بتقـاسيه
علشان زمان المجد فات !
وفيـن تِـــودّوا وشّـكــــــم
يـوم الــســؤال مـن ربّـكم
فـرّطـتوا ليـه فى أرضــكم
ورضـيـتوا مـنها بالفـُتـات
فـين مـجـدِكم بيـن الأمـم
فـين العــزيـمه والــشَّمَـم
فــين السّواعـد والهـِمـم؟
تِمسح عن "القدس" الآهات
تِمسح عن "القدس" الآهات
[/size] | |
|