أول حصة فـ يوم الدم .. حاتم السمان

صباح الخير يا أولاد ..
قيام .
جلوس ..
وطلعوا كتب الدين ..!!
افتح يابنى صاد عشرين ..
اقرأ الفاتحة وسوره التين ..
عرّف كل العالم انك ..
طفل .. وسنك
بقى خمسين ..!!
شد حزامك ..
على مريلتك ..!!
امسك قلمك ..
هات كراستك ..
واكتب ...
ليه القدس حزين ..؟
هات الدرس الأول تانى ..
حاول تفهم منه معانى ..
تعرف انك ..
حر .. سجين ؟!
اقلب صفحه وشوف الدرس ..
ايه عنوانه ؟
واوعى يهمك طول الحبس ..
بكره صلاح يرجع بزمانه ..!
العنوان مكتوب فـ كتابى ..
هو ايه معنى سلام .؟
قام الدره ..
بعزيمة حرة ..
وقال ومخافش ..
( سين ) : سلامات ع اللى اتكلم ..
والـ ( لا ) . لا مافيش حرية ..
والـ ( ميم ) هى : موت تتعلم ..
من موتك معنى الوطنية ..!
أيوه صحيح ..
( سين ـ لام ـ ميم ) ..
سِلَم اطلع وارفع صوتك ..
قول للعالم نفسى أعيش .!؟
( عين ـ لام ـ ميم ) ..
عِلم اتعلم قول واتكلم ..
حقك ضايع ..
عدل مافيش ..
قام أستاذه باسُه .. وقاله ..
تستاهل تاخد ..
ممتاز ..
صبح الدره شهيد القدس ..
لأ وكمان أصبح ..
أستاذ .!!