[b]مجلسنا العامر[b](من ديوان خرابيش ) تحت الطبع[/b]

الإخوة الأفاضل


فى هذه الأيام ، ونحن فى هذه المرحلة الحاسمة ، والهامة فى تاريخ مصر

نحن أحوج مايكون لفتح الأعين ، وحسن التقدير ، وسلامة الإختيار،

لذلك أردت فقط هنا أن أعرض ( إيجابيات ) المجلس المنحل ، حتى

نراعى الله ، والوطن ، والضمير فى الإختيار القادم .




المجلس العامر


لومصربلدناحقيقى وغاليه علينا وغيرها مفيش

خلونا نقول بَقى كِلمة حق لبعض ومانخبّيش


نواب مجلسنا العامر كانوا نواب مَعزَى وتفاريح

وان نايب منهُم نزل الدايره يفرقع كام تصريح

تصاريحُه كلها كدب لزوم الشّغل وأكل العيش

خلّونا نقول بقى كِلمة حق لبعض ومانخبّيش


نايب زى الرّهوان بيلف ويجرى فى الانتخابات

تِفتِكره الدّايره بعد نجاحُه ياهاجر.. يايكون مات!!

بيروح وبينسى الدّايره وطول الدّوره مايعدّيش

خلّونا نقول بَقى كِلمة حق لبعض ومانخبّيش


والتَّانى ان سَلِّم صُدفَه يقدِّم إيد .. لكن ببرود

ويمد إيديه الاتنين للبَنك ويلهف منّه قروض

وإيديه فى الانتخابات عاليه واحنا بنهتف له يعيش

خلّونا نقول بَقى كِلمة حق لبعض ومانخبّيش


والتَّالت تلقاه تحت الكرسى ان جُم مَرَّه يناقشوه

والرَّابِع نايم يرفع إيده موافق !! لو سألوه!!

والخامِس فوق جورناله ونازل فى المخاليق تلطيش

خَلونا نقول بَقى كِلمة حق لبعض ومانخبّيش


بالذمَّه ازاى ح يشرّع نايب غايب طول اليوم؟

وان جَه للمجلس صُدفه يبقى جَى يكمّل نوم!!

عاوزين نوّاب فى المجلس صاحيه ومش عاوزين طرابيش !!

عاوزين نوّاب فى المجلس صاحيه ومش عاوزين طرابيش !!

خلّونا نقول بَقى كِلمة حق لبعض ومانخبيش

لومصربلدنا حقيقى وغاليه علينا وغيرها مفيش


شعر / محمد البسيونى